Fór á þessa mynd kl. 22 í gærkvöldi með Hjölla vini mínum og BjaKK frænda mínum, hittumst fyrst á Grand Rokk en systir mín og Ægir litli skutluðu mér þangað. Þessi mynd er eftir hinn skemmtilega leikstjóra Jim Jarmusch og má líkja við smásagnasafn því myndin er öll bara litlar sögur sem eiga í raun ekkert sameiginlegt nema að fólk situr og er að tala saman og drekka kaffi og reykja. Það er skemmtilegur stíll á myndinni, þ.e. hún er öll í svart hvítu og kemur það vel út og kvikmyndatakan er einföld og passar vel við einfaldleika myndarinnar. Margir skemmtilegir leikarar koma fram í myndinni og sumir þeirra leika sjálfan sig og hún er bara nokkuð fyndin á köflum.