Ég væri til í að kaupa mér þennan DVD pakka en þetta eru 9 klst af viðtölum við þá hermenn og fanga í útrýmingabúðum nasista. Ekki er notaðar neinar gamlar myndir heldur eru þetta bara viðtöl og staðirnir sýndir eins og þeir eru í dag.

Voðalega eru menn latir við að blögga - Árni hefur ekki bloggað í tvær vikur og aðrir lítið skárri.

Blessed: The Autobiography: Ég keypti þessa bók í Manchester í ferðinni okkar síðustu helgi og var að klára hana um helgina. Hún heitir Blessed og er skrifuð af Best og einhverjum félaga hans (sem er blaðamaður) fyrir um 3 árum síðan þegar hann var að bíða eftir nýrri lifur sem síðan dró hann til dauða.
Þetta er skemmtileg bók og maður fær aðeins meiri innsýn í það hversu erfitt líf þessi snillingur átti og hversu langt leiddur hann var af drykkju. Dæmi um það er t.d. þegar hann gekk frá heimili sínu í USA peningalaus (því konan hafði falið peningana) um 10km leið til að fara á bar og sat þar og vonaði að einhver myndi splæsa drykk á hann. Kona á næsta borði fer á klósettið og hann stelur úr veskinu hennar 10 dollurum og fer á næsta bar og eyðir peningnum. Eins er magnað að bróðir hans (sem er um 15 árum yngri en Georgie Boy) var ansi efnilegur knattspyrnumaður og það mikið efni að hann var talinn vera með svipaða hæfilega og George. Hann spilaði sinn fyrsta leik 15 ára og eftir leikinn ákvað hann að spila aldrei aftur knattspyrnu því hann vildi ekki lenda í fjölmiðlum og slíku eins og bróðir sinn og stóð við það.
Það skín aðeins í gegnum lesturinn að George hefur aldrei í raun gert sér grein fyrir hversu miklum vandræðum hann átti með drykkjuna og taldi hana í raun aldrei vera vandamál. M.a.s. þegar líkaminn var farinn að gefa sig taldi hann það ekki vera vegna drykkjunnar. Hann hafði svo sterka þörf fyrir sopann að hann gat aldrei sagt nei við því þegar honum var boðið og hafði ekki mikinn vilja til að berjast á móti fíkninni. Eins gat hann aldrei tekist á við vandamál heldur var alltaf hlaupandi burt frá þeim eins og hann segir sjálfur.
Eftir að hann varð Evrópumeistari með United 22 ára og knattspyrnumaður evrópu sama ár gerði hann í raun ekkert í knattspyrnunni nema flakka á milli meðalliða og spilaði m.a. í 3 deild á Englandi, utandeild á Englandi (að vísu bara 1-2 leiki) og í USA og Kanada. Lið United hrundi í raun eftir titilinn og liðið fylltist af meðalmönnum þegar stjörnurnar hættu hverjar á eftir öðrum vegna aldurs.
Bókin er bæði mjög skemmtileg og auðveld aflestrar og einnig sorgleg og synd að þessi snillingur hafi skemmt feril sinn eins og hann gerði.

Ég kláraði loksins The DAM Book eftir Peter Krogh um helgina. Þessi bók fer í gegnum það hvernig maður á að skipuleggja myndasafnið sitt og er eftir einn fremsta "fræðimann", ef svo má kalla, um þessi mál í dag. Ég er komin með skýrari mynd af því hvernig á að skipuleggja safnið eftir þennan lestur og hef ég einnig verið í smá tölvupóstsamskiptum við höfundinn í sambandi við ýmis mál og er hann ansi hjálplegur. Nú þarf ég að gjörsamlega umbyllta því hvernig ég hef skipulagt safnið mitt og það er væntanlega nokkra mánaða verk þangað til allt verður komið í gott horf. Ég stefni reyndar að því að lesa hana aftur fljótlega, eða a.m.k. renna yfir aðal kaflana því það er margt sem hefur farið framhjá manni. Ég mæli með þessari bók sem vilja taka þessi mál föstum höndum.

Fann fyrsta handritið í gær þegar ég var að blaða í gegnum fullt af drasli heima í gær þegar ég var að pakka. Og svo fann ég líka umsóknarblaðið til að fá að taka þátt í myndinni, en það voru nokkrar síður með ýmsum spurningum. Svo á Oprah Winfrey 52 ára afmæli í dag.

Úr vísir:
Bono, söngvari U2, ætlar með hjálp nokkurra fyrirtækja að setja á markað vörur undir heitinu Red.

Eitt prósent ágóðans mun renna til baráttunnar gegn alnæmi, berklum og malaríu í Afríku. Þetta er mjög svalt, sagði Bono. Það er svalt að vilja breyta heiminum.

Á meðal þeirra fyrirtækja sem taka þátt í verkefninu eru American Express, Converse, Gap og Giorgio Armani.

Eitt prósent finnst manni frekar lítið til að gefa til góðgerðamála. Ég held að með flestar vörur, og þá merkjavörur, þá sé um 20%-50% smurt ofaná og ef 1% fer til góðgerðamála þá stendur ansi stór hluti eftir sem þessi stórfyrirtæki hirða og græða á því að fólk kaupir þessar vörur til að styrkja gott málefni. Ullabjakk segi ég!
Af hverju var t.d. ekki hægt að stofna fyrirtæki sem heitir RED og t.d. gera fatalínur og ALLUR hagnaður rennur til góðgeramála? Ég held að margir myndu vilja vinna hjá slíku fyrirtæki.

Núna er ég búinn að biðja Pálma um það í um 2 ár að koma með filmur sem hann á af okkur á unglingsaldri til að skanna og setja þær hingað inn - ætli maður verði ekki bara að sætta sig við það að hann mun ekkert finna þær og koma með þær.

Flottur nýi bannerinn og til hamingju Bjarni.

PhysioRoom.com Sports Injury Shop, News & Advice gæti hjálpað okkur eitthvað í tippinu. Verst að úrvalsdeildin er bara þarna - næsta deild fyrir neðan hefði hjálpað okkur meira held ég.

Við Sonja fórum á Brokeback Mountain og drógum Hjölla með. Þetta er frábær mynd sem ég mæli eindregið með. Hún er mannleg og um fólk og með frábæra persónusköpun ef svo má segja.

... og þetta var mitt sjónarhorn.

Þetta var sjónarhorn mitt á leikinn.

Setti inn tvö stutt video úr ferðinni - það fyrra sýnir hversu skakkir við vorum og það seinna stemminguna á lokamínútum United leiksins: Check it!

Ég er líka kominn heim.
Jólabannerinn er ennþá uppi hérna og spurning hvort það verði jól allt árið á þessari síðu. Ég stefni nú samt að því að taka þetta út en það verður sennilegast ekki næstu dagana.

Getur Hjölli sett upp FTP svæði eða eitthvað slíkt sem við getum sett inn myndirnar okkar og video í ferðinni þannig að allir ferðalangarnir hafi allar myndir sem voru teknar?

Var að koma í hús, eftir u.þ.b. 11 klukkutíma ferðalag.

Þar sem að það var ljóst að ég yrði ekkert í vinnunni næstu daga þá varð maður jú að klára það sem fyrir lá og var ég því í vinnunni til kl. 21:50 (og var ekki búinn að borða kvöldmat). Þá skundaði ég heim og sótti fótboltadótið og dreif mig í boltann alveg glorhungraður. Strax eftir bolta brunaði ég beint á BSÍ og keypti mér hamborgara og franskar og gaf kisu litlu líka.
Því næst var hægt að fara að hugsa um morgundaginn (en hann er einmitt núna) og fór ég að leita að passanum mínum sem ég hélt að væri í skúffunni þar sem ég hef alltaf geymt passann minn. En svo var nú ekki í þetta sinn og þá rifjaðist það upp fyrir mér að auðvitað var hann ekki þarna, því ég tók hann með mér til Danmerkur í haust. Þá var ekkert annað í stöðunni en að leika bínulítið við kisu litlu og fara svo heim á Fálkagötuna. Eftir þó nokkra leit fann ég passann, en hann hafði lent undir einhverju blaðadrasli í lítilli kistu í jólatiltektinni (eða öllu heldur gamlárskvöldstiltektinni).
Þá var hægt að hugsa um hvað ég ætla að taka með mér og setja í þvottavélina og var klukkan nú orðin 1:30. Svo straujaði ég skyrtu og pressaði buxur og fann eitthvað meira til að vera í og nú er ég að fara að taka út úr þvottavélinni og setja í þurkarann svo þetta verði nú allt orðið þurt og gott í fyrramálið. Og ég held að ég skelli í eina vél bara svona til öryggis.

Þið voruð rétt í þessu að missa af frábærum Innlit/útlit þætti. Sorrý.

Þá er maður búinn að klára að borga köfunarferðina fyrir utan flug til og frá Englandi og gistingu í London. Gerði ég þetta með mjög öruggri leið í gegnum netið, en ég sendi visakortsnúmerið mitt í tölvupósti og svo bað ég konuna sem sá um greiðsluna að eyða póstinum strax og sendi hún mér til baka að hún hafi gert það, en ég held að hún sé mjög heiðarleg kona :)

Haukur og Siggi höfðu ekkert í okkur Hjölla að gera í tennisnum í gær og við unnum þá 6-3 og 6-1.

Dagskráin lítur þá svona út:

Fimmtudagur - ferðalag og frjáls tími. Mæting um 13.00 á völlin, verið er að skoða hvernig við förum uppeftir, en best er að allir komi á sama tíma svo hægt sé að tékka sig inn á sama tíma og sitja saman. PP er að skoða ferðamöguleika. á vellinum verður svo tippað og því þurfa PP og Hjölli að muna að koma með blöð um leikina.
Föstudagur - Tími Sigga verður um daginn, um kvöldið verður svo farið út að borða á fínan stað, helst með sterkan mat svo við getum fengið okkur nokkra öllara með, eftir það er farið á Casino og eytt restinni af ferðapeningnum. Eftir að allur peningur er horfinn þá er haldið á klúbb og eru 2 sem koma til greina, Electric Dreams og Electric Ballroom.
Laugardagur - ÁHH er búinn að finna tottenham pöbb fyrir leik, svo er leikur, svo er ferðalag til Manchester og svo er pub crawl eða pub golf eða almenn drykkja.
Sunnudagur - pöbb, leikur, pöbb og hola Satans þar sem við ætlum að uppgötva nýjar hljómsveitir.
Mánudagur - almenn þynnka og ferðalög.

Þetta er svona í fljótu bragði hver stefnan er, auðvitað getur allt breyst en munkið að vera með snyrtilegan klæðnað fyrir klúbbarölt og Casino osfrv. Bretar eru mjög strangir með dress code.

Er enginn áhugi á því að hittast í vikunni og ræða ferðina??? Pálmi, Siggi, Hjölli og Oddgeir?

Þá er ég búinn að skoða hvert við eigum að fara fyrir Tottenham leikinn, 4 barir koma til greina, þið kíkið á þetta og við ákveðum síðan í framhaldi hver hentar best.

Spursbarir

Ég sendi þeim sem svaraði póstinum mínum á umræðuþræðinum einkapóst og spurði hvenær best væri að mæta á pub fyrir leik og hvað hann mæli með að við gerum eftir leik og þetta var svarið:

Hi. I´d be there as soon as it opens around 11 o´clock. The sing-song usually doesn´t start until Boylie gets there, and that´s about 12-13 pm. Sometimes there´s about 10meter queu to get in so I suggest you get there as early as possible. After the game I suggest you go in to Deansgate. Have a great trip!

Deansgate er gata með mörgum fínum stöðum virðist vera og spurning að kíkja bara þangað strax eftir leikinn en hún er í miðbæ Manchester og er hægt að lesa um hana hér. Mér líst einnig vel á að vera mættir á Bishops Blaze kl. 11 og ná stemmingunni (hann er er á Chester Road nr. 708).

Ég bjó til excel skjal sem ég ætla að prenta út og hægt verður að krota inn á það planið úti ... þið getið séð það hérna (henti inn grófum atriðum er ég er ekki viss um tímasetningar á þessu öllu): Get it!

Við ættum að hittast allir í vikunni og ræða aðeins og jafnvel skipuleggja ferðina. Hvenær komast menn til að funda? Vilja menn hittast í hádeginu eða eftir vinnu? Við Árni komumst nánast hvenær sem er og því þurfa Hjölli, Pálm, Odd og Sigg að segja hvenær þeir komast.

Hérna er ágætis síða yfir topp 10 staði eftir tegundum: Check it!

Maður hefur oft séð myndir frá ferðum íslendinga á leiki úti og oft virðast þeir hitta leikmenn fyrir eða eftir leiki - veit einhver hvernig menn hafa komist í slíkt? Er einhver áhugi á því að reyna að hitta leikmenn ef það er mögulegt?

Þó við ætlum ekki að vera í einhverju helv... búðarrápi í London þá væri ég til í að kíkja í þessa búð ef tækifæri gefst. Þetta er ansi stór ljósmyndabúð (líklegast ein sú stærsta í London) með miklu úrvali. Hún er nálagt Euston lestarstöðinni.

Við Sonja kíktum í kringluna í gær til að ná í myndir úr framköllun og versla aðeins fyrir gjafakort sem ég fékk í jólagjöf. Ég keypti mér kaffikvörn í Hagkaup sem kostaði bara 2900 krónur og keypti mér Illy kaffibaunir sem margir telja þær bestu sem til eru. Nú ætti kaffið mitt að vera í heimsklassa (já, ég veit að ég þarf alltaf að fara út í öfgar með flest sem ég tek mér fyrir hendur).

Ég var líka að gæla við að kaupa mér allt Far Side safnið í lit í tveimur stórum bókum og kostaði það tæplega 9þ kall - það er ansi magnað og er ég enn að gæla við það að kaupa það.

Fékk þessi skilaboð áðan:

You haven't made any friends.

Ég veit ekki hvernig þeir hafa grafið þetta upp.

Nú er ég búinn að vera einn heima síðan á Þriðjudaginn, en þá skutlaði ég Matthew út á flugvöll, en hann var að fara í rannsóknarleyfi til Englands næsta hálfa árið.

Og þrátt fyrir að ég sé ekki enn búinn að auglýsa íbúðina mína til leigu, þá hef ég samt fengið 3 fyrirspurnir, en íbúðin leigist með öllu og kisu litlu líka.

Svo á morgunn (sem er reyndar í dag því það er kominn nýr dagur) þá verður haldinn hátíðarfundur MOBS og á Sunnudaginn á að labba á fjall. Gönguferðin er liður í nokkrum göngum sem farnar verða nú í vetur og á að labba á nokkur fjöll og enda svo á hæsta fjalla landsins, en það mun samkvæmt nýjustu mælingum vera Ásfjall og samkvæmt nýjustu mælingum þá er það líka fallegasta fjall á landinu, en fallegasta tjörn landsins er við rætur fjallsins en hún heitir Ástjörn og hef ég m.a. synt í þeirri tjörn og veitt fjöldann allan af hornsýlum.

Hér átti að vera mynd af Ásfjalli og Ástjörn, en ég átti bara enga, svo ég set því mynd af Sigga að spila tennis í staðin.

Ég sendi inn fyrirspurn á umræðuþráð um Manchester United um hvað sé best að gera fyrir/eftir leik. Gaman að sjá hvort eitthvað komi úr því.

Ég skora hérmeð á Pálma að segja upp áskrift sinni að DV!

Músin Magnús er tónlistarblogg sem Eyjó vinnufélagi minn og félagar hans halda úti.

Tók saman (svona til gamans) þær plötur sem ég á af lista yfir 30 bestu plötur ársin að mati Zýrðs Rjóma (feitletraðar):

		Flytjandi	Plata
1		WOLF PARADE	Apologies To The Queen Mary
2		SUFJAN STEVENS	Illinois
3		FOUR TET	Everything Ecstatic
4		DEERHOOF	The Runners Four
5		CLAP YOUR HANDS SAY YEAH!	Clap Your Hands Say Yeah!
6		THE DECEMBERISTS	Picaresque
7		ANIMAL COLLECTIVE	Feels
8		WILDERNESS	Wilderness
9		OKKERVIL RIVER	Black Sheep Boy
10		LCD SOUNDSYSTEM	LCD Soundsystem
11		LOW	The Great Destroyer
12		CARIBOU	The Milk Of Human Kindness
13		SMOG	A River Ain't Too Much To Love
14		SLEATER KINNEY	The Woods
15		ARCHITECTURE IN HELSINKI	In Case We Die
16		JUAN MACLEAN	Less Than Human
17		BROKEN SOCIAL SCENE	Broken Social Scene
18		GORILLAZ	Demon Days
19		ART BRUT	Bang Bang Rock and Roll
20		CLOR	Clor
21		THE CRIMEA	Tradegy Rocks
22		SPOON	Gimme Fiction
23		TEST ICICLES	For Screening Purposes Only
24		THE DOVES	Some Cities
25		JACKSON AND HIS COMPUTER BAND	Smash
26		ROGUE WAVE	Descended Like Vultures
27		BLACK MOUNTAIN	Black Mountain
28		THE RUSSIAN FUTURISTS	Our Thickness
29		FRANZ FERDINAND	You Could Have It So Much Better
30		BONNIE PRINCE BILLY & MATT SWEENEY	Superwolf

Ég fékk þá hugmynd um helgina að gera bók með myndum frá Ketildölum í Arnarfirði. Þetta er ótrúlega fallegt og ljósmyndavænt svæði og sennilega ekkert rosalega margir sem koma þangað þó það sé einhver slæðingur af ferðamönnum og síðan þekkir maður náttúrlega fólkið eitthvað þarna. Magga frænka mín sagði í einhverri jeppaferðinni inn á Bíldudal að ég ætti að koma dölunum á kortið með ljósmyndum því það þyrfti að vera innanbúðarmaður og það fékk mig til að pæla meira í þessu.

Ég ætla að setja hérna inn 4 myndir svona til að gefa forsmekkinn af myndunum sem koma vonandi síðar í vikunni:

Víðir frændi að keyra úr fjárhúsunum eftir að vera búinn að gefa (hann býr á næsta bæ og því keyrandi).


Fólk að horfa á ljósmyndarann í stofuglugganum í Feigsdal. Frá vinstri: Sonja, Ægir litli, Særún, Alexandra, Bjarki, Baddí, Melkorka, Gréta og Gessa.


Fjárhúsin í Feigsdal.


Feigsdalur.

Eins langar mig til þess að safna saman gömlum myndum úr sveitinni og þá aðallega af mömmu og systkinum hennar frá því þegar þau voru börn og skanna þetta inn og setja í bók þannig að allir ættingjarnir geti notið þessara mynda. Hef nefnt þetta aðeins við mömmu og hún ætlar að hjálpa mér að finna myndir hjá ættingjum. Held að þetta gæti verið skemmtilegt verkefni bitz.

Verst að maður er að vinna á þessum tíma:
Ný sápuópera hefur hafið göngu sína á Stöð 2 og verður framvegis á dagskrá alla virka morgna kl. 10.20.

My Sweet Fat Valentina er einhver allra vinsælasta sápuóperan í heiminum í dag en þessir s-amerísku þættir fjalla um ástir og örlög Valentínu, ungrar og lífsglaðrar stúlku. Valentína er svolítið sver og þykir í fyrstu ekki allra fegurst fljóða en hún bætir það upp svo um munar með sinni innri manngerð og er lifandi dæmi um að fegurðin komi innan frá.

Ég er kominn heim eftir jarðaför frænda míns á vestfjörðum og mun ég gera þeirri ferð betri skil síðar í máli og myndum.

Það er allt að gerast í myndvinnslu- og utanumhöldshugbúnaðarmjöglangtorðpökkum* þessa dagana. Apple kom með á markaðinn Aperture fyrir um mánuði síðan sem lofaði ansi góðu en hefur kannski ekki alveg staðist væntingar en þeir eru á réttri leið og þetta verður magnaður hugbúnaður í framtíðinni því þeir eru það sterkir (sbr. FinalCut Pro).
Núna er risinn Adobe að vakna af blundi og voru að kynna nýjan hugbúnað sem heitir Adobe Lightroom sem virðist vera svipaður og Aperture en þetta er beta útgáfa sem Mac notendur geta sótt sér að kostnaðarlausu en loka útgáfan kemur út í vor og mun þá kosta eitthvað. Adobe er greinilega að koma svona snemma með þetta út (og það ókeypis) til að Aperture nái ekki jafn mikilli fótfestu og verður þetta því spennandi ár fyrir svona hugbúnað myndi ég halda.
Ég fékk um daginn tölvupóst frá ACDSee en þeir eru að fara að setja á markað Pro útgáfu af hugbúnaði sínum sem er alveg nýr hugbúnaður og kemur á markað í lok vikunnar. Þeir báðu mig að skoða forritið (ég fæ semsagt ókeypis útgáfu) og koma með athugasemdir hvernig mér finnst það og það lofar svona ágætu en ég er ekki viss um að þetta forrit hafi eitthvað í hin tvö að gera. Ýmislegt ágætt í þessu en margt sem ég myndi vilja sjá öðruvísi - ég ætla að búa til litla skýrslu og senda þeim í vikunni eins og þeir báðu um.
Önnur forrit sem taka kannski ekki allt vinnuflæðið eru líka sterk, IView kom með nýja útgáfu í lok síðasta árs sem er ágæt og IMatch (forritið sem ég hef notað síðasta árið) er að koma með útgáfu á næstu dögum en þeir hafa verið seinir með uppfærslu þó að þetta sé sennilega eitt sterkasta forritið í dag og ég hef verið að gæla við að skipta og fara yfir í IView eða jafnvel ACDSee Pro ef það lofar góðu. Já, spennandi tímar framundan. 8)

* Þessir forritunarpakkar sjá um allt vinnuflæði fyrir myndir, þ.e. flokkun niður í Keywords og hópa, RAW vinnslu, setja á vefinn, afritun o.s.frv.

Jæja nú eru allir búnir að ganga frá kaupum á þessari stórferð slembara til Englands þar sem þeir munu leggja England í rúst eins og sönnum íþróttabullum sæmir. Við þurfum að skipta á milli okkar verkefnum svo við getum nýtt tímann sem best - ég ætla að leggja fram smá hugmynd varðandi hvað menn þurfa að gera og svo eru allar athugasemdir mjög velkomnar:

Jóhann - Man UTD barinn fyrir leik og eftir leik ef þeir vinna. Einnig væri gott ef Jóhann væri búinn að skoða næturlíf Manchester líka.
Árni Hr - Tottenham bar fyrir leik, einnig ætlar ÁHH að athuga hvort eitthvað spennandi sé að gerast í tónleikum á föstudagskvöldi í London.
Hjölli - ætlar að kanna næturlíf í London fyrir fimmtudagskvöld og föstudag.
SiggiÓ - ætlar að búa til ítarlega spurningakeppni í fótbolta - stefnt verður að nýta ferð okkar í lestinni í þennan skemmtilega leik. Auk þess ætlar Siggi að vera tilbúinn með ferð á föstudeginum þar sem markverðir staðir (eða barir) verða skoðaðir og hvaða gæðabjór við eigum að smakka osfrv.
Pálmi - skoða fínan restaurant fyrir föstudagskvöldið í London, auk þess að kíkja á lestarferðir á milli london og manchester, hef heyrt að það sé best að fara með business class þar sem þar er frítt að drekka, gott væri að PP myndi aðeins skanna þetta ef mögulegt er.
Oddgeir - Soho

Endilega komið með athugasemdir um þetta - ef þið hafið eitthvað meira spennandi að bjóða þá er það velkomið.

Þá er maður búinn að græja fótboltaferðina og að sjálfsögðu sett á VISA rað og byrja að borga eftir tæpa 2 mánuði. Væri nú ekki galin hugmynd að tékka sig inn snemma og taka svo taxa í Keflavík og fara á pöbb og fá sér hamborgara og bjór þar. Svo skutlast maður bara aftur upp á leifsstöð rétt fyrir brottför.

Ég er núna að hlusta á hnattvæðingaumræður í speglinum á rás 1 og drekka espresso og skrifa blogg.

"Ég hef oft eldað og vaskað upp allsber og oft fengið heitar slettur út um allt og þ.m.t. á félagann."
Burkni Helgason, 3.1.2006

Er þetta kannski málið?

Espresso Machines, Espresso/Coffee Grinders, Coffee Brewing Equipment & Parts

Hérna er hægt að kaupa allskonar aukahluti fyrir espresso vélar. Það sem ég þarf að kaupa mér er tól til að þrýsta kaffinu í síuna og kaffikvörn en hún má væntanlega bíða. Held að þetta sé ágætis vél sem ég keypti mér.