Vó, maður verður að redda sér miðum á frumsýninguna í Borgarleikhúsinu!

Ástralski tónlistarmaðurinn Nick Cave hefur tekið að sér að semja þrjú samhangandi leikverk fyrir Vesturports-leikhópinn. Leikritin eiga að fjalla um rokkhljómsveit. Cave semur alla texta og tónlist í uppfærslu Gísla Arnar Garðarssonar á Woyzeck eftir Georg Buchner.

Leikritið er samstarfsverkefni Vesturports og Borgarleikhússins. Frumsýnt verður í Barbican Centre-leikhúsinu í London hinn 12. október n.k. Eftir 10 sýningar í London verður leikritið frumsýnt í Borgarleikhúsinu 28. október. Nick Cave verður viðstaddur.

Gísli Örn segir að upptökur tónlistarinnar í London hafi gengið mjög vel fyrir sig. "Ég verð að viðurkenna að þetta var dálítið sérstakt svona til að byrja með. Að vera þarna í stúdíói með Nick Cave og The Bad Seeds að taka upp sérsamin lög fyrir sýninguna! En við vorum búnir að forvinna þetta vel, svo það var nokkuð mikið á hreinu hverjum við stefndum að í upptökunum."

Sjá nánar í sunnudagsblaði Morgunblaðsins.